Iruña-Pamplona, 2018ko apirila. Mendi Film Festival eta Golem-ek mendia, abentura eta natura gaien inguruko zinemagintzarik onena eta gaur gaurkoena aurkeztuko dute Iruñan Mendi Tourraren bidez, hilaren 23tik 26ra. Golem Baiona zinemetan egingo da Mendi Tourra, eta eguneko bina saio errepikatuko dira. Iaz 1000 ikusletik gora bildu ziren Golem Baionako lehen Mendi Tour eskaintzan, eta hark hauspotuta aurtengoa ere indarrean dator.
10 pelikula eskainiko dira lau egunetan banatuta. Tartean da Dirtbag: The Legend of Fred Beckey Bilbao Mendi Film Festivaleko 10. edizioko Sari Nagusia jaso zuen lana, baita Mountain ere mendi zinemagintzaren historiako ekoizpenik handienetako bat, Bilbon Epaimahaiaren aipamen berezia jaso zuena, eta haiekin batera Bilbon saria jasotako beste lau lan ere: The Last Honey Hunter, The Frozen Road, Mama eta Safety Third.
Al Otro Lado de la Cuerda filmak aparteko aurkezpena behar du: lau eskalatzaile iruinseme ezagun daude protagonisten artean, eta Iruñan lehendabiziko aldiz proiektatuko da publiko aurrean protagonistak bertan direla. Astelehenean, apirilak 23an, izango da hori. Javier Valero aragoarraren lana da, eta Arkaitz Yurrita eskalatzaile ormaiztegiarra da dokumentaleko ardatza. Pirinioetako horma desberdinetan eskalatzeko puntako sokalagunak bilatuko ditu, haien jarduera estiloa eta filosofia azaleratzeko asmoz. Eta hor ageri dira Mikel Zabalza, Unai Mendia, Ekaitz Maiz eta Eneko Cesar iruindarrak.
Gaur, Golem Baionan bertan egindako aurkezpenean, Javier Valero, Arkaitz Yurrita eta Unai Mendia aritu dira Jabier Baraiazarra Bilbao Mendi Film Festivaleko zuzendariarekin batera.
Esanak:
"Zintzotasunari eta konpromisoari zor zitzaion lana da. Eskaladaren inguru espezializatuetan ezinbesteko filma bat", Jabier Baraiazarra.
"Filma honetan eskalatzaile nafarrak egotea ez da kasualitatea, pirineismoari egin dioten ekarpena aberasgarria da oso", Arkaitz Yurrita.
|
Apirilak 23, astelehena 'Al Otro Lado de la Cuerda'
|
Sarrerak Golem plataforma digitalean eskuratu daitezke, eta baita leihatilan ere, saioko 6na euroan. Lau egunetako abonua ere eskuratu daiteke leihatilan, 20 euroan.
Mendi Film Festival eta Golem-ek bat egin dute berriro ekitaldi hau antolatzeko. Zinema eskaintza erakargarriaren aldeko apustuan, eskutik doaz bata eta bestea. Bilbon, Mendi Film Festivaleko saioak hartzen ditu Golemek Azkuna Zentruko zinemetan. Aldi berean, Iruñako Mendi Tourraren laguntzaile dira Poloniako Kultura Institutua Madrilen -Mama filma haien eskutik eskainiko da-, Zineuskadi, Desnivel eta Diario de Noticias.
Programazioa:
Apirilak 23 astelehena
AL OTRO LADO DE LA CUERDA
Gaur egungo eskalatzailerik garrantzitsuenetako 9 elkartzen dira film dokumental zirraragarri honetan, eskaladako etikari, balioei eta izaerari buruz hitz egiteko. Jean eta Pierre Ravier anaiak, Christian Ravier, Ekaitz Maiz, Mikel Zabalza, Albert Salvadó, Arkaitz Yurrita, Eneko César eta Unai Mendia ahobizarrik gabe ariko dira, Pirinioetako eskaladaren alderik ezkutuena azaltzeko.
THE LAST HONEY HUNTER
Bertigoa eragiteko moduko labarretan zintzilikatuta aritzen dira ezti ehizan Nepalgo Kulung herritarrak. National Geographic-entzat landutako dokumental bikaina.
Kultura eta Natura Film Onena BMFF'17
Apirilak 24 asteartea
MOUNTAIN
Mendi zinemagintzaren historiako ekoizpenik distiratsuenetakoa. Mendia eta gizakiaren arteko harremanaren lotura estuak eta kontraesanak. Australiako Ganbera Orkestrak sortutako soinu bandari Jennifer Peedom zuzendariak egokitutako filma Renan Ozturk-en pareko sortzaileen irudiekin, eta biribiltzeko, Willen Dafoe aktore ezagunaren narrazioa duena. #MendiTour bidez soilik ikusi liteke.
Epaimahaiaren Aipamen Berezia BMFF’17
AURRERA
Pasioak gidatutako bizipoza du Irene Sarrionandiak. Mendian lasterka aritzea maite du. Izabako Camille Extreme probaren 13 edizioak amaitu dituen lasterkari bakarra da. 69 urte ditu.
URUCA II - BUGABOOS EDITION
Animaziozko film laburra. Hugo eta Felipinho glaziarren erdian dagoen orratz bat eskalatzen saiatuko dira, eslakada alpinoaren erronka guztiei aurre eginez. Harkaitz izoztu eta hezea, haien arteko komunikazio txarra, norberaren barneko deabruak eta hotza, hotz izugarria, horiek izango dira gainditu beharrekoak.
Apirilak 25 asteazkena
DIRTBAG: THE LEGEND OF FRED BECKEY
Urteko pelikula 2017an. Fred Beckey gogoan (1923-2017), eskalatzaile eta alpinista handia, lehen igoera asko eta asko sinatutakoa, hainbat belaunaldirentzat inspirazio iturri. Bilbon ikusleak liluratu zituen filma honek, eta beste hainbat jaialdi entzutetsuetan ere arrakasta handia izan du: Torelló, Banff, Bansko, Autrans, Kendal, Krakow, Tegernsee...
Sari Nagusia eta Ikuslegoaren Saria BMFF’17
WHERE THE WILD THINGS PLAY
Girl Power! Slackline, BASE jauziak, mendiko bizikleta, haitz eskalada, free eskia,... Krystle Wright abentura argazkilariaren ukitu txundigarriarekin.
Apirilak 26 osteguna
MAMA
Kinga Ociepka-Grzegulska, 9. graduan dantzan dabilen eskalatzaile poloniarra, bi haurren ama, 20 urtez bizi izan da bere pasioari bide emanez, eta orain, helburu berri bati ekitekotan da: aurrez emakume bakar batek eskalatu ezin izan duen bide bat eskalatzea.
Epaimahaiaren Saria BMFF’17
THE FROZEN ROAD
Ben Page britainiar gazteak hiru urtetan egin du munduaren itzulingurua bizikletaz. Pasarte muturrekoena Kanadako Artikoa gurutzatu zuenekoa izan zen, bera bakarrik, eta negu gorrian! Bide eta ibai izoztuak, tenperatura jasanezina, elur ekaitzak, otsoen mehatxua, bakardadea, erreskate bat, urratze mentala… guztiari egingo dio aurre era naturalean, epikotasunean erori gabe.
Zuzendari Onena BMFF'17
SAFETY THIRD
Brad Gobright da protagonista. Sokarik gabeko eskaladak egiten Alex Honnolden pare ote dago? Alderatu al daitezke biak? Ezagutu gehiago mutur-muturrean, eta topikoak bazterreratuta, eskalatzen duen mutil gazte hau.
Eskaladako Film Onena BMFF'17
