Jan Zahula argazkilari txekiarraren "The Edge of Guillotine" argazkiak irabazi du BBK Mendi Film Bilbao-Bizkaia kartela Saria CVCEPHOTO lehiaketan, beraz mendi zinemaldiaren aurtengo irudi nagusia izango da.
Elbaren bailaran, Txekiako Errepublikako Suitza Bohemia eskualdean, badira hareharrizko haitz eta mendiak, eta haietako ertz zorrotz batean ageri da Jenny Fischer eskalatzaile estatubatuarra, "Gilotina VIIb" bidea eskalatzen.
Xehetasun teknikoak:
- Egilea: Jan Zahula
- Kokalekua: Lbaské údoli, Txekiar Errepublika
- Eskalatzailea: Jenny Fischer
- Bidea: Gilotina, VIIb gradua (txekiako harearri gradua) -lehen igoera 1978-
- Azalpena: "Jennyk bide estetiko hori hautatu eta eskalatu zuen aste batzuk lehenago, eta bertan eskalatzen ari zela argazkiak ateratzea nahi zuen. Beste zeregin batzuetara joana nintzen hara, baina asmatu genuen, eta egindako saioko argazkirik gustukoena da hauxe".
- Kamera: Sony A7III
- Lentea: Tamron 17-28 f/2.8, 18mm-tan botata
- EXIF: 1/250S, f/2.8, ISO 100
Hauxe, beraz, BBK Mendi Film Bilbao-Bizkaia zinemaldiaren 14. edizioko karteleko irudia, babesle nagusien izendapenekin jantzia: Bizkaiko Foru Aldundia, Bilboko Udala eta BBK Fundazioa.
Donostiako Club Vasco de Camping Elkarteak 7.ez antolatu du CVCEPHOTO mendiko jardueren nazioarteko argazkilaritza lehiaketa, eta 2017tik ematen da bertan Mendi Filmeko karteleko irudiaren saria, bide batez 700€-ko diru-saria ere baduena.
Mendi Film Kartelak CVCEPHOTO bidez
2020: INTO THE LIGHT, Sandi Bertoncelj
2019: TOP OF AFRICA, Christian Pondella
2018: LEARNING TO FLY, Rainer Eder
2017: THE LIGHTHOUSE, Christoph Jorda
Maiatzaren 29an, larunbata, egingo da CVCEPHOTO sari banaketa ekitaldia Donostiako Antzoki Zaharrean (18:00), jendeari irekia, eta hara begira sarituen berri eman dute jada. Irabazlea Marcin Ciepielewski poloniarra izan da, "The X" argazkiarekin, bigarren saria Alex Buisse frantziarrak irabazi du "Moulin" lanarekin, eta hirugarrena Alessandro Cantarelli italiarrak irabazi du "Lavaredo's Gloria" argazkiarekin. Zazpigarren edizioak 58 herrialdetako 372 egileren lanak bildu ditu, eta guztira 952 argazki aurkeztu dituzte.
