'Sciana Ceni (The Wall of Shadows)' Eliza Kubarska zinegile poloniarrak zuzendutako filma Jannu edo Kumbhakarna (Himalaia, 7710m) mendiaren altzoan kokatzen da, Dmitry Golovchenko eta Sergey Nilov alpinista errusiarrek 2019ko udaberrian burutako jarduera epikoaren inguruan. Protagonista nagusia, ordea, espedizioarentzat lanean ari den sherpa familia da: mendi sakratuari zor dioten errespetua eta beldurra, lan-ordainaren menpekotasuna, semeari ikasketetarako aukera emateko gurasoek duten gogoa, eta erronkan tragikoki atzentzen ari diren alpinistekiko kezka.
Lan sarituekin abenduaren 12an, igandea, Non Stop saioak antolatu dira Sala BBK eta Golem zinemetan:
Epaimahaikideen balorazioak:
- Mauro Leveghi, Trento Film Festival Presidentea
- Kepa Sojo, zinegilea
- Paula Olaz, soinu banda konposatzailea
- Joaquín Gómez, soinu banda konposatzailea
- Arrate Landaluze, ikus-entzunezkoetako itzultzailea
Sari Nagusia
Sciana Cieni. The Wall of Shadows
Filmak ikuskera oso originala du, eta alpinismoaren munduan oso gutxitan entzuten den ahots bati egiten dio lekua. Sotila eta zirraragarria, gidari sherpek gaur egun duten dikotomia islatzen du, eta gizakiari bere mugak onar ditzan eskatzen dio.
Zuzendari onena
Le Cavalier Mongol
Zuzendariak jakin du naturarekin bat egiten duen pertsona baten bizimodua transmititzen, besteak beste, John Ford, Akira Kurosawa edo Nikita Mikhalkov zuzendari enblematikoak gogorarazi dizkiguten narrazio-baliabide bereizgarriak erabiliz, eta dokumentalaren eta fikzioaren arteko zubian dabiltzan errealitateetan barna bidea eginez.
Gidoi onena
Godspeed Los Polacos
Hari narratzaile bikain batek ematen dio joskura filmari, eta historiako une handi baten berri ematen digu, kirola aitzakiatzat hartuta askatasunaren bila menturatzen diren bost ikaslek eginiko bidaiaren bidez.
Argazkilaritza onena
A White Dream
Filmak eskutik hartuta garamatza naturara, filmaren protagonistaren antza handia duen proposamen fotografiko eta estetiko soil baten bidez, baina esan-indar eta eduki aldetik konplexutasun handia gordez.
Epaimahaiaren Saria
The Traverse
Emakume kementsu eta ausart batek bere mugak gainditzeko ahaleginaren historia erakusten du filmak, zirrara bizia eraginez. Abenturaren eta mendiaren mugak ez direla soilik gizonezkoen barruti erakusten dute hala protagonistak nola filmak berak.
Soinu-banda Onena
Laurent Parisi - Le Cavalier Mongol
Filmaren musikak ekialdeko koloreak agertzen ditu, western giro egokiarekin aberasturik. Hala, natura biluziaren doinuak gizakion barnean pizten den sena azaleratzen du. Filmaren ekoizpen musikalak fintasun aparta du, homogeneotasun handiz bateratzen ditu munduko musikak, eta pertsonaia errepikaezin honen arima bakartia berekin darama, eskutik hartuta.
Mendiko Film Onena
Mendiak 1976
Hunkiberatasuna, umiltasuna eta hurbiltasuna dira filmaren hiru “tasun” nagusiak; izan ere, lanak ezin argiago erakusten du alpinismoaren muin-muinean dagoen balioa: sokakideen arteko anaitasuna.
Eskaladako Film Onena
Black Ice
Filmak argi islatzen du eskalada irtenbide egokia izan daitekeela giro sozial zailetan bizi diren gazteentzat, eta umorez eta sentiberatasun handiz jorratzen du gai aski ezpaltsua: arrazakeria. Gizartearen moldeetara egokitu gabeko pertsonentzat irteera eta bizimodu berri bat bihurtzen da eskalada, eta filmak lortzen du hori islatzea.
Kultura eta Natura Film Onena
La Pantalla Andina
Kultura oso aparteko lekuetara eramaten du filmak, eta ametsen fabrika zer den erakusten die umeei, zazpigarren artearen bidez bizitzan aukera bat izan dezaten.
Kirol eta Abentura Film Onena
After Antarctica
Klima-aldaketari buruzko alerta-mezu guztiz premiazkoa helarazten du lan honek, ingurumenaren aldeko borrokan iraganaren eta geroaren arteko mugarri izan den lankidetzaren bidez.
Film Labur Onena
Melting Landscapes
Klima-aldaketaren arazo konplexuari buruzko gogoeta sakona egiten du lan honek, argazki bikainean oinarritzen den berealdiko proposamen estetikoaren bidez.
Euskarazko Film Onena
Amagana
Gure sustraietarako bidaia erakusten du filmak, musikaren, euskararen aberastasun dialektalaren eta naturarekiko eta ama lurrarekiko maitasunaren bidez.
Epaimahaiaren Aipamen Berezia
Julia
Eskaladaren ikuspegi berri bat bultzatzen du, etorkizunekoa, eta neska eskalatzaile batek bere mugak gainditzeko egiten duen ahalegina agertzen du, beste askorentzat bide-erakusle eta bultzada izateko moduan.
Ikusleen Saria
Mendiak 1976
