Mendi Filmek, Bizkaiko Foru Aldundiak, eta Ternua Group-ek, Mendiko Kulturaren inguruko zinemagintza sustatzeko xedez sortutako Bekaren lehen deialdian Tamara Lucarini egileak aurkeztutako TXANGO proiektua izan da hautatua. 10.000 euroko balioa duen Beka jasoko du, aurten bertan, 2021ean, proiektua garatu eta aurkezteko.
TXANGO filma 2021eko abenduaren 3tik 12ra egingo den BBK Mendi Film Bilbao-Bizkaia mendiko zine jaialdian estreinatuko da jendaurrean.
Deialdiko oinarrietan ezarritako baldintzak betetzen dituzten 13 proiektu aurkeztu dira, eta haiek aztertu eta epaitzeko, bost laguneko lan taldea bildu da.
- Lara Izagirre, zinegilea
- Alberto Iñurrategi, mendizalea
- Itziar Garcia, zine ekoizlea
- Aitor Gisasola, zinegilea eta ikusentzunezko irakaslea
- Jabier Baraiazarra, Mendi Film Elkarteko zuzendaria
Mendi Film Bizkaia Ternua Bekaren lehen deialdi honetako erantzuna oso ontzat jo dute, kopuruz bezala proiektuen kalitatea ere oso ona izan dela iritziz.
2022ko Bekaren deialdira begira arrasto oparoa zabaldu delakoan, bat datoz balorazio horrekin Bekaren eragileak, Bizkaiko Foru Aldundiko Euskara, Kultura eta Kirol saila, Ternua Group outdoor arropa enpresa, eta Mendi Film Festival Elkartea.
