Catherine Destivelleri ez zitzaion burutik pasa ere egingo noraino iritsiko zen, haurra zela, gurasoek Fontainebleaura jolasera eramaten zutenean eta hango blokeetan lehen eskalada urratsak ematen hasi zenean. 16 urterako Verdonen zebilen eskalatzen. 1985ean Bardonechiako lehen eskalada txapelketan lortutako garaipenak profesional mundurako ateak zabaldu zizkion. Zailtasun maila gorenak jo ondoren, alpinismora egin zuen jauzi. Trangoko Dorrea, Alpeetako ipar horma mitikoetan bakarka eta neguan eginiko eskaladak, Shisha Pangmako igoera... horiek izan ziren mugarrietako batzuk bere ibilbidean, eta Himalaiako horma handienetan ahalegin ausartak etorri ziren gero.
